وزيراعظم سيد يوسف رضا گيلاني پاران ناڻي واري وزارت کي آءِ پي پيز جي رهتن کي حل ڪرڻ جي لاءِ واپڊا کي ڏيڍ ارب رپيا فوري طور تي جاري ڪرڻ، توانائي جي شعبي ۾ نجي سيڙپڪاري جي طريقيڪار کي آسان بڻائڻ لاءِ پلاننگ ڪميشن جي ڊپٽي چيئرمين، ناڻي، پاڻي ۽ بجلي جي سيڪريٽرين تي ٻڌل ڪميٽي جوڙڻ جي هدايت

اسلام آباد - 30 مئي (اي پي پي) وزيراعظم سيد يوسف رضا گيلاني چيو آهي ته حڪومت توانائي جي موجوده بحران کي حل ڪرڻ ۽ ملڪ جي لاءِ توانائي جي تحفظ جو عزم ڪيو آهي. ڪالهه اربع ڏينهن هتي پرائيويٽ پاور انفراسٽرڪچر بورڊ (پي پي آءِ بي) جي اجلاس جي صدارت ڪندي هن پيٽروليم ۽ قدرتي وسيلن واري وزارت کي هدايت ئي ته بجلي گهرن کي گئس جي فراهمي لاءِ انتظام ڪيا وڃن. اجلاس ۾ ملڪ ۾ بجلي جي کوٽ تي ضابطو آڻڻ جي لاءِ اضافي بجلي پيدا ڪرڻ کي نظر ۾ رکندي پرائيويٽ پاور پراجيڪٽس جي اڳڀرائي ۽ انهن جي مستقبل جي صلاحيت جو جائزو ورتو ويو. وزيراعظم چيو ته پي پي آءِ بي نون پاور پراجيڪٽس جي پراسيسنگ ۾ پيشيواراڻي مهارت برقرار رکندي ۽ عوام جي خوشحالي لاءِ حڪومتي ڪوششن ۾ تعاون ڪندي قومي ۽ عالمي سيڙپڪارن ۽ توانائي جي شعبي سان لاڳاپيل ادارن کي سهولتون ڏيندي. هن هدايت ڪئي ته توانائي جي شعبي ۾ نجي سيڙپڪاري جي ترغيب جي لاءِ طريقيڪار کي آسان بڻائڻ جي لاءِ هڪ ڪميٽي جوڙي وڃي، جيڪا پلاننگ ڪميشن جي ڊپٽي چيئرمين، ناڻي ۽ اقتصادي معاملن واري ڊويزن ۽ پاڻي ۽ بجلي جي سيڪريٽرين تي ٻڌل هجي. وزيراعظم ناڻي واري وزارت کي هدايت ڪئي ته آءِ پي پيز جي رهتن کي حل ڪرڻ جي لاءِ واپڊا کي ڏيڍ ارب رپيا فوري طور تي جاري ڪيا وڃن. هن چيو ته حڪومت توانائي جي موجوده بحران جي حل ۽ توانائي سيڪيورٽي جو پڪوپهه ڪيو آهي. وزيراعظم چيو ته 1993ع ۾ شهيد محترمه بينظير ڀٽو جي حڪومت انرجي  ٽاسڪ فورس جوڙيو هو، جنهن جي نتيجي ۾ 1994ع ۾ پاور پاليسي تيار ٿي ۽ پرائيويٽ پاور اينڊ انفراسٽرڪچر بورڊ قائم ٿيو، جنهن جو مقصد حڪومت ۽ ان جي ادارن طرفان هڪ ئي جاءِ تي سهولتون فراهم ڪرڻ هو. وزيراعظم چيو ته جڏهن موجوده حڪومت 2008ع ۾ اقتدار سنڀاليو ته ملڪ کي هڪ ڀيرو ٻيهر طلب ۽ رسد جي شديد فرق کي منهن ڏيڻو پئجي رهيو هو، جيڪو پيڪ لوڊ آورز ۾ 5 هزار ميگاواٽ کان وڌيڪ هو. هن چيو ته چئلينج جي شدت جو احساس ڪندي جمهوري حڪومت مختلف مسئلن باوجود بجلي جي صورتحال جي بهتري لاءِ وڏي محنت سان ڪم ڪيو ۽ پرعزم ڪوششون ڪيون. هن چيو ته آءِ پي پيز سدائين بجلي جي شعبي ۾ هڪ وڏو اهم ڪردار ادا ڪيو آهي. هن چيو ته توانائي جي فراهمي لاءِ آءِ پي پيز جي اهميت جو اندازو ان ڳالهه مان لڳائي سگهجي ٿو ته هن وقت ملڪ ۾ 28 آءِ پي پيز بجلي فراهم ڪري رهيا آهن. وزيراعظم چيو ته پاڪستان بجلي جي شعبي ۾ طلب ۽ رسد جو وڏو فرق آهي، جنهن سبب بجلي جي پيداواري گنجائش ۽ انفراسٽرڪچر ۾ اضافو ضروري ٿي ويو آهي.