|
اسان کي گڏجي پارٽي وابستگي کان مٿانهون ٿي ملڪ کي
مسئلن جي ڌٻڻ مان ڪڍڻو پوندو، احتساب جو خودمختيار ادارو قائم ڪيو وڃي: عمران خان
اسلام آباد – 19 جون (اي پي پي) پاڪستان تحريڪ انصاف جي سربراهه
عمران خان چيو آهي ته اسان کي گڏجي پارٽي وابستگي کان مٿانهون ٿي ملڪ کي مسئلن جي
ڌٻڻ مان ڪڍڻو پوندو، احتساب جو خودمختيار ادارو قائم ڪيو وڃي. اربع ڏينهن قومي
اسيمبلي ۾ حلف کڻڻ کانپوءِ پنهنجي پاليسي بيان ۾ عمران خان قومي اسيمبلي ۾ پنهنجي
پهرين تقرير ۾ سڀ کان پهرين سردار اياز صادق کي چونڊن ۾ ڪاميابي تي مبارڪباد ڏني ۽
چيو ته هو ميان نواز شريف کي وزيراعظم بڻجڻ تي مبارڪباد ڏي ٿو. هن چيو ته هو
پنهنجي صحت سبب گهڻي دير ايوان ۾ نه ٿو ويهي سگهي کيس ٺيڪ ٿيڻ ۾ وڌيڪ 6 هفتا
لڳندا. هن چيو ته 60ع جي ڏهاڪي ۾ پاڪستان جو مثال ڏنو ويندو هو. اڄ هو پارلياماني
پارٽي جي سربراهه طور نه پر هڪ پاڪستاني جي حيثيت سان ڳالهائڻ چاهي ٿو. هن چيو ته
پي آءِ اي جو سڄي دنيا ۾ مثال ڏنو ويندو هو، ڪيترين ئي ايئرلائينز کي پي آءِ اي پيرن
تي بيهارڻ ۾ مدد ڏني، اسان جو خطو وسيلن سان مالامال آهي، جبلن کان سمنڊ تائين 12
موسم آهن. هن سوئيٽزرلينڊ جو مثال ڏنو ته اتي ڪجهه به نه آهي پر هو ترقي يافته ملڪ
آهي. اسان جي خراب حالت جو سڀ کان وڏو سبب ناانصافي آهي. سوئيٽزرلينڊ، جرمني،
فرانس ان لاءِ خوشحال ملڪ آهن ڇو ته اتي انصاف آهي. بنگلاديش ناانصافي سبب اسان
کان جدا ٿيو. هن چيو ته ٽيڪسن جي اوڳاڙي جو انتظام ڪمزور آهي. ريلوي جهڙن ادارن کي
ٺيڪ ڪرڻ لاءِ ماهرن جون خدمتون حاصل ڪيون وڃن. هن چيو ته صرف 10 لک ماڻهو ٽيڪس نيٽ
۾ ۽ نادرا جي رڪارڊ مطابق 30 لک ماڻهو ٽيڪس جي دائري کان ٻاهر آهن. رائل اسٽيٽ ذريعي
مال ٺاهيندڙن کان ٽيڪس نه وٺڻ ناانصافي ٿيندي. اسان کي اهي ڪم ڪرڻا پوندا جيڪي
هينئر تائين ڪنهن به نه ڪيا.
پي ٽي آءِ سميت سموريون مخالف ڌر جون پارٽيون چونڊ
سڌارن جو بل آڻين، مسلم ليگ (ن) سڀ کان پهرين ان جي حمايت ڪندي، اليڪشن 2013ع تي
مسلم ليگ (ن) کي به خدشا آهن: گهرو وزير چوڌري نثار علي خان
اسلام آباد – 19 جون (اي پي پي) گهرو وزير چوڌري نثار علي خان پاڪستان
تحريڪ انصاف جي چيئرمين عمران خان جي صحتيابي کانپوءِ ايوان ۾ اچڻ تي آجيان ڪندي آڇ
ڪئي آهي ته پي ٽي آءِ سميت سموريون مخالف ڌر جون پارٽيون چونڊ سڌارن جو بل آڻين،
مسلم ليگ (ن) سڀ کان پهرين ان جي حمايت ڪندي، اليڪشن 2013ع تي مسلم ليگ (ن) کي به
خدشا آهن. اربع ڏينهن پاڪستان تحريڪ انصاف جي چيئرمين عمران خان جي قومي اسيمبلي ۾
پهرين تقرير جي جواب ۾ گهرو وزير چوڌري نثار علي خان چيو ته هو عمران خان کي هڪ
ڊگهي عرصي کانپوءِ ايوان ۾ ڏسي خوش آهي، الله تعاليٰ کيس مڪمل صحت ڏي ته جيئن ملڪي
سياست ۾ پنهنجو ڪردار ادا ڪري سگهي. هن چيو ته عمران خان جي تقرير جو هڪ هڪ لفظ محب
وطن پاڪستاني جو آواز هو. آئون خاطري ڪرايان ٿو ته ايوان طاقت جو مرڪز ٺهندو. مون
پهرين به چيو آهي ته سچ ڳالهائيندس، سچ نه ڳالهايو وڃي ته الله تعاليٰ جي رحمت
ناراض ٿي ويندي آهي. چوڌري نثار علي خان چيو ته چيف اليڪشن ڪمشنر جي لاءِ مخالف ڌر
اڳواڻ جي حيثيت سان اسان تحريڪ انصاف ۽ پارليامينٽ کان ٻاهر سمورين پارٽين سان
مشاورت ڪئي هئي. جسٽس (ر) فخرالدين جي ابراهيم جو نالو منهنجي ياد موجب سڀ کان
پهرين تحريڪ انصاف پاران آيو هو. ان جي نالي تي حڪومتي انڪار کانپوءِ جسٽس
فخرالدين جي ابراهيم ٽيليفون ڪري پنهنجو نالو واپس وٺڻ جو چيو هو پر اسان کيس چيو
ته توهان جو نالو سمورين مخالف ڌر پارٽين ڏنو آهي. هن چيو ته ڪرڪيٽ ۾ نيوٽرل امپائرنگ
جو تصور عمران خان ڏنو آهي. جڏهن هڪ نيوٽرل امپائر ٺهي ويندو آهي ته ان کان غلط
فيصلا به ٿيندا آهن. هن تحريڪ انصاف سميت سمورين مخالف ڌر پارٽين کي آڇ ڪئي ته هو
چونڊ سڌارن وارو بل آڻين. مسلم ليگ (ن) سڀ کان پهرين ساٿ ڏيندي. جيڪڏهن ملڪ ۾ صاف
شفاف چونڊون نه ٿيون ته جمهوري عمل تي آڱريون کڄنديون. هن چيو ته مون کي پاڻ چونڊ
عمل تي خدشا آهن. پنجاب ۾ چونڊن کان اڳ ڪلارڪ کان وٺي چيف سيڪريٽري تائين سڀ تبديل
ڪيا ويا. هن چيو ته صرف چئن تڪن ۾ نه پر 30 جي مخالف ڌر ۽ 30 تڪن جي نشاندهي حڪومت
ڪري، 60 تڪن جي چونڊ نتيجن جي جهڙي طرح چاهين ٿا جاچ ڪرائين ته جيئن کير جو کير ۽
پاڻي جو پاڻي ٿي وڃي، جيڪو ملوث هوندو نه صرف ان کي سيٽ کان محروم ڪيو ويندو پر
ڌانڌلي ۾ ملوث هر هڪ کي نوڪري تان برطرف ڪيو ويندو.
اخبارن ۾ قرآني آيتن تي ٻڌل اشتهار شايع ڪرڻ کي روڪڻ
جي لاءِ اخباري مالڪن ۽ انهن جي تنظيمن سان گڏجي حل ڪڍيو ويندو: وفاقي وزير پرويز
رشيد
اسلام آباد – 19 جون (اي پي پي) اطلاعات ۽ نشريات جي وفاقي وزير
سينيٽر پرويز رشيد چيو آهي ته اخبارن ۾ قرآني آيتن تي ٻڌل اشتهار شايع ڪرڻ کي روڪڻ
جي لاءِ اخباري مالڪن ۽ انهن جي تنظيمن سان گڏجي حل ڪڍيو ويندو، مسلمان هجڻ جي
حيثيت سان اسان کي اخبارن ۾ شايع ٿيندڙ قرآني آيتن جي تقدس ۽ احترام کي نظر ۾ رکڻ
گهرجي، اخبار ڇاپيندڙن کي اشتهار ڇاپڻ کان پهرين ورهائڻ واري کي ورهائڻ کان اڳ ۽
پڙهڻ واري کي پڙهڻ کان اڳ قرآني آيتن جي تقدس جي حوالي سان پنهنجو فرض ادا ڪرڻو
پوندو. ڪالهه اربع ڏينهن قومي اسيمبلي ۾ مخدوم زاده باسط بخاري جي اخبارن ۾ شايع
ٿيل قرآني آيتن جي بي حرمتي بابت ڌيان ڇڪايو نوٽيس جو جواب ڏيندي اطلاعات ۽ نشريات
جي وفاقي وزير پرويز رشيد چيو ته هي وڏو اهم معاملو آهي، قرآن ڪريم اسان جي دلين
جي ڌڙڪن آهي ان جي بيحرمتي اسان سڀني جي لاءِ تڪليف جو سبب آهي. حڪومت اڪيلي طور
قرآني آيتن جي ڇپائي جي حوالي سان فيصلو نه ٿي ڪري سگهي. بهتر ٿيندو ته اخباري
مالڪن جي تنظيمن وسيلي ان جو حل ڪڍيو وڃي ته جيئن قرآن پاڪ جي آيتن جي ڇپائي تي
پابندي جو تاثر به نه ملي ۽ قرآن آيتن جي بيحرمتي به نه ٿئي.
وزيراعظم ميان محمد نواز شريف پاران پاڪستان جي جوهري
صلاحيت جي انتظامي ۽ سيڪيورٽي ڍانچي تي مڪمل اعتماد جو اظهار
اسلام آباد – 19 جون (اي پي پي) وزيراعظم ميان محمد نواز شريف
پاڪستان جي جوهري صلاحيت جي انتظامي ۽ سيڪيورٽي ڍانچي تي مڪمل اعتماد جو اظهار
ڪندي چيو آهي ته اسٽريٽجڪ پروگرام کي مضبوط بڻائڻ تي ڪيترائي سال لڳا آهن ۽ هي
ٻاهرئين جارحيت جي خلاف ڀرپور طاقت کي يقيني بڻائيندي خطي ۾ امن جي لاءِ هٿي جو
سبب آهي. هن اها ڳالهه ڪالهه اربع ڏينهن ڊائريڪٽر جنرل اسٽريٽجڪ پلانز ڊويزن
ليفٽيننٽ جنرل (ر) خالد احمد قدوائي طرفان پاڪستان جي اسٽريٽجڪ پروگرام جي باري ۾
ڏنل خصوصي بريفنگ جي پڄاڻي تي چئي.
وزيراعظم محمد نواز شريف اربع ڏينهن مظفرآباد آزاد
ڪشمير ويجهو نيلم جهلم هائيڊرو پاور پراجيڪٽ جو دورو ڪيو
اسلام آباد – 19 جون (اي پي پي) وزيراعظم محمد نواز شريف اربع ڏينهن
مظفرآباد آزاد ڪشمير ويجهو نيلم جهلم هائيڊرو پاور پراجيڪٽ جو دورو ڪيو. وزيراعظم
محمد نواز شريف جي دوري جي موقعي تي اعليٰ عملدارن منصوبي جي باري ۾ بريفنگ ڏني.
پاڻي ۽ بجلي وارو وفاقي وزير خواجه محمد آصف، اطلاعات ۽ نشريات وارو وفاقي وزير
سينيٽر پرويز رشيد ۽ شوڪت ترين به وزيراعظم سان گڏ هئا. هي وزارت عظميٰ جو عهدو
سنڀالڻ کانپوءِ ملڪ ۾ جاري ڪنهن ترقياتي منصوبي جو سندس پهريون دورو هو. ان کان اڳ
آزاد ڪشمير جي صدر سردار محمد يعقوب، آزاد ڪشمير جي وزيراعظم چوڌري عبدالمجيد ۽
آزاد ڪشمير جي اڳوڻ وزيراعظم راجا فاروق حيدر منصوبي واري جاءِ تي وزيراعظم محمد
نواز شريف جو استقبال ڪيو. نيلم جهلم منصوبي مان 969 ميگاواٽ سستي بجلي پيدا
ٿيندي. اهو 240 ميگاواٽ جي چئن يونٽن تي ٻڌل آهي.
وزيراعظم پاران نيلم جهلم پن بجلي منصوبي ۾ دير تي
گهري ڳڻتي جو اظهار، منصوبي کي 2015ع تائين مڪمل ڪرڻ جي هدايت
اسلام آباد – 19 جون (اي پي پي) وزيراعظم محمد نواز شريف نيلم جهلم
پن بجلي منصوبي ۾ دير تي گهري ڳڻتي جو اظهار ڪندي ان منصوبي کي 2015ع تائين مڪمل
ڪرڻ جي هدايت ڪندي چيو آهي ته ملڪ کي توانائي جي تمام گهڻي ضرورت آهي، وڌيڪ وقت
زيان ڪرڻ جي ڪا به گنجائش نه آهي، قوم کي قرباني ڏيڻي پوندي. هو ڪالهه اربع ڏينهن
مظفرآباد ويجهو نيلم جهلم پن بجلي منصوبي جي دوري کانپوءِ صحافين سان ڳالهائي رهيو
هو. وزيراعظم منصوبي جي جلد تڪميل جي لاءِ
ڪم جي لاءِ گهربل فنڊ بروقت فراهم ڪرڻ جي
خاطري ڪرائيندي چيو ته ملڪ ۾ توانائي جو شديد بحران آهي، جنهن کي منهن ڏيڻ جي لاءِ
اسان ڏينهن رات ڪم ڪري رهيا آهيون. هي سالن جا مسئلا آهن ۽ ماضي ۾ تمام گهڻو وقت
ضايع ٿيو. وزيراعظم چيو ته هن سڀ کان پهرين آزاد ڪشمير جو دورو ڪيو ۽ اهو به پن
بجلي جي منصوبي لاءِ. وزيراعظم چيو ته ملڪ جي بدقسمتي آهي جو هتي منصوبا ته تمام
گهڻا ٺاهيا وڃن ٿا پر عملدرآمد گهٽ ئي ٿئي ٿو. هن چيو ته هن منصوبي تي 28 سالن کان
ڪم ٿي رهيو آهي ۽ 40 ارب رپين ۾ مڪمل ٿيندڙ منصوبي تي هاڻي 274 ارب رپيا خرچ
ٿيندا. هن چيو ته هڪ ننڍي منصوبي تي هڪ غريب ملڪ جا ايترا وسيلا خرچ ٿي رهيا آهن
جيڪي پڇڻ وارا هئا اهي پنهنجا مفاد ڏسندا رهيا. هن چيو ته اسان منصوبي جي لاءِ
سمورا وسيلا فراهم ڪنداسين، جنهن مان هڪ هزار ميگاواٽ بجلي پيدا ٿيندي.
|
